"So Joseph wen go from Nazaret town Galilee side, to Betlehem Judea side, King David's town, cuz he come from King David's ohana. He go ova dea fo sign up wit Mary, da wahine da ohana wen promise fo marry him. She stay hapai. Wen dey stay dea, da time come fo her fo born her baby. An she wen born her numba one boy, an wrap him up inside some cloths, an lay him down inside one ting fo hold da cows food, cuz no mo room for dem inside da small hotel.

Dat nite, ova dea inside da fields, get sheep farmas taking care dea sheeps. Right den an dea one angel messenja guy from da Boss Up Dea Inside Da Sky come by dem. All aroun dem one awesome light wen shine from da Boss. An dey wen come real scared. But da angel guy say, "No scared. I come fo tell you guys Good Stuff From God dat goin make you guys an all da peopo stay good inside. Dis day inside King David's town, one boy wen born dat goin take you guys outa da bad kine stuff you stay doing. He da Christ Guy, da Spesho Guy God Wen Send. He da Boss. Dis how you goin know him. You goin find one baby dat stay wrap up inside plenny cloths, lying down inside one ting fo hold da cows food."

Right den an dea uku paila angel guys from da sky wen show up wit da first angel guy. Dey saying good stuff about God lidis: "Up inside da sky wea God stay, He stay awesome! An ova hea on top da earth, If God like wat peopo doing, He goin made dea heart rest inside."

Den da angel guys wen go way from dem an go back by God inside da sky. Da sheep farmas tell each odda, "Eh brahs, we go Betlehem fo see dis ting dat when happen, dat da Boss Up Dea Inside Da Sky wen tell us."

So dey run an find Mary an Joseph, an da baby stay dea, lying down inside one ting for hold da cows food. Wen day see da baby, dey tell everybody wat da angel guys wen say bout dis boy. Everybody dat wen hear dat, stay tinking bout wat da sheep farmas wen tell dem. But Mary wen put all dese tings inside her heart, an tink plenny how spesho dey stay."